Былырыын ойуур баһаарын уотуттан Горнай улууһун Бэс-Күөл дэриэбинэтэ улаханнык эмсэҕэлээбитэ. Сонно тута Ил Дархан Айсен Николаев дьаһалынан сэлиэнньэ олоҕун дьаһаҕын чөлүгэр түһэрэр үлэ тэриллибитэ.
Ол курдук, 70 күн иһигэр 34 толору хааччыллыылаах олорор дьиэ, 9 хотон тутуллубута. Ону сэргэ гаас, уот, оптоволокно тардыллыбыта.
Ол улахан, чөлүгэр түһэрии, көхтөөх үлэтигэр биһиги тэрилтэбит «Саха Өрөспүүбүлүкэтин сир оҥоһуутугар сулууспа» Бэс-Күөл олохтооҕор, бааһынай хаһаайыстыбалаах Ефремов Ким Иннокентьевич саҥа хотонун тутарыгар төһүү күүс көмө буолбута. Бу үлэҕэ көхтөөхтүк кыттыбыт тэрилтэбит үлэһиттэрин махтана ааттыыбыт: салайааччы Семенов Афанасий Михайлович, тэрилтэ тутаах үлэһиттэрэ: Чекуров Василий Гавриилович, Герасимов Александр Александрович, Прокопьев Александр Васильевич, Ушницкий Семен Петрович, Старостин Владимир Сергеевич, Руфов Геннадий Семенович, Алексеев Григорий Макарович, Дмитриев Михаил Гаврильевич, Филиппов Роман Леонидович.
Быйыл Горнай улууһун Бэс-Күөлүгэр Ким Иннокентьевич Ефремов Ампаардаах учаастагар ыалдьыттыы ыҥырбытын үөрүүннэн ылынан самаан сайын кэлбитинэн, сайылык күнүгэр сөп түбэһиннэрэн, ыам ыйын 20 күнүгэр былааннаабыппыт.
Бу кэлэн туран Ефремов К.И.хаһаайыстыбатыгар уонна кини нөҥүө Горнай улууһун тыатын хаһаайыстыбатын бары үлэһиттэригэр анаан Алгыспыт маанытын аныыбыт:
Самаан сайын кэлбитин,
Сайылык күнүн былыр — былыргыттан
Хас биирдии саха ыала,
Аар Айылҕабытыгар сүгүрүйэн
Аал уоту оттон, арыылаах алаадьынан,
Үрүҥ сылгы сиэлинэн,
Кырылыы кыынньыбыт кымыһынан
Айах тутан күндүлүүр үтүө үгэстээхпит.
Бу үтүө үгэспитин тутуһан
«Саха Өрөспүүбүлүкэтин сир оҥоһуутугар сулууспа»
Тэрилтэ үлэһиттэрэ ыраас санаанан салайтаран
Сайылык күнүнэн эҕэрдэлии,
Алгыс маанытын аныы
Ампаардаах учаастагар кэллибит,
Төһүү күүс буолан, биир сүбэннэн
туппут саҥа хотоммут
Киэҥ, куоҥ, сырдык, сылаас буоллун!
Хаһаайыстыба үлэтэ таһаарыылаах буоллун!
Саҥа хотоҥҥо бэйэ оҥорон таһаарбыт
Сахалыы аһа - үөлэ дэлэйдин!
Сайылыктарга, алаастарга, сыһыыларга
Хонуу-хордоҕой аайы хоноҕор муостаах,
Сыһыы - толоон аайы сыспай сиэллээх
Төрөөн- ууһаан төлөһүйдүн!
Үрүҥ илгэ дэлэйдин, ходуһаларга от,
Бааһыналарга үүнээйи арааһа өлгөмнүк үүннүн!
Олохпутугар уйгу-быйаҥ, илгэ-өҥ дэлэйдин!
Дом!
