«СӨ сир оҥоруутун сулууспата» тэрилтэ (сал. Афанасий Семенов) өрөспүүбүлүкэ үрдүнэн тыа хаһаайыстыбатыгар туһаныллар сирдэри оҥорууга, үүнээйини үүннэриигэ, оттуур ходуһалар, бааһыналар, оҕуруот сирдэрин буорун састаабын үөрэтиинэн дьарыктанар, бу сирдэр өҥ, быйаҥ туруктанарыгар кэтээн көрөр, тупсарар биир кэлим политиканы ыытар.
От ыйын 22 күнүттэн атырдьах ыйын 4 күнүгэр диэри бу тэрилтэ оперативнай отделын специалистара Охлопков Р.М., Прокопьев А.В., Дмитриев М.Г., Гоголев А.В. уонна Корнилов Н.А. Нам улууһун 11 нэһилиэгин бааһыналарыгар, оттуур ходуһаларыгар киэҥ агрохимическэй чинчийии үлэтин ыыттылар. 7016 га сир оҥоһулунна. 151 гааҕа оҕуруот аһыгар “сэбирдэх” диагностикатын ыыттылар. Билиҥҥи туругунан азот, фосфор, калий төһө тиийэрин, тиийбэтин бэрэбиэркэлээтилэр.
Чинчийии түмүгүнэн тыа хаһаайыстыбатыгар туһаныллар сирдэр туруктара биллиэҕэ, специалистар минеральнай уонна органическай уоҕурдуулары туһаныыга ыйыылары, сүбэлэри биэриэхтэрэ. Агрохимическэй чинчийии үлэтин түмүгэ аны кыһын биллиэҕэ уонна Нам улууһун тыатын хаһаайыстыбатын управлениетыгар, нэһилиэктэргэ тиэрдиллиэҕэ.
